Guinhatagan pasidungog kag pagkilala ang mga kabataang Capiznon nga nagpasakop sa Batang Pinoy 2022 National Championship kag nagsungkit sang nanari-sari nga kadalag-an para sa probinsya sang Capiz sa patag sang isports nga guinhiwat sang Disyembre 17-21, 2022, sa Vigan City, probinsya sang Ilocos Sur.
5 ka Gold, 6 ka silver kag 4 ka bronze ang nahakot sang mga kabataan sa nasambit nga paindis-indis kon sa diin nakuha nanday Carille Jeannine Diestro sa Tungal 10-12 Category, Antonio Rivas, Ganda 13-15 category, James Bolante, Ganda 13-15 Virtual Pencak Silat Category nga lunsay nakakuha sang Gold. Nakakuha man sang bulawan nga mga medalya sanday Renier James Vidal sa HOPE Boys Table Tennis nga pahampang kag Gold man ang naangkon ni Angel Villagracia sa 100- Meter Hurdle.
Silver Medalist naman sanday Jasmin Jamelarin, Precious Fria Bernabe, Khristine Conjurado, kag Angel Villagracia sa 4×100 Meter Relay Category, Maribell Regala sa Triple Jump Category kag si Menchie Kate Dizon ang nakakuha man sang Pilak nga medalya sa Mini Cadet Table Tennis Category.
Samtang, nakuha naman nanday Jasmin Jamelarin kag Angel Villagracia ang Saway nga Medalya sa 100 Meter Hurdle kag Leslie Faye Dizon sa Cadet Table tennis, Lorraine Pelayo Tungal 10-12 Virtual Pencak Silat category.
Tig P7,000 ang nabaton sang mga nakakuha sang Gold Medal, P5,000 naman para sa silver medalist, kag P3,000 para sa nakasungkit sang Bronze nga medalya. Ini nga insentibo ang personal nga guintugyan ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 “𝗢𝘁𝗼” 𝗖𝗮𝘀𝘁𝗿𝗼 kaupod si Vice Governor James “Mitang” Magbanua. Maluwas diri nagbaton man sang sa pagabi-abi ni Governor Castro sa mga kabataan dala ang ila sini nga mga guinikanan, nalipay guid ang Gobernador sa kabaganihan nga guinpakita sang kabataang Capisnon nga naghatag sang ila sini ikasangkol sa patag sang isport sa Batang Pinoy 2022 event.
“Guindala ninyo ang matuod-tuod nga kadungganan sa Capiz nga maayo nga senyalis bangud sa karon kamo na ang guinlagas sang inyo nga mga kasumpong nga sadto anay sa mga paindis-indis ang Capisnon kilala nga maisog bangud sila ang yara sa pinaka ulihi nga nagapang lagas sang ila sini nga kontra” mensahe sang Gobernador.
Dugang pa ni Gov. Castro nga sa nasambit nga pagpasidungog guintipon guid sini ang tagsa ka Department Heads, kag opisyales sang probinsyal nga pagdumalahan agud epresentar sa mga empleyado ang mga awardees nga nagdala sang onor sa probinsya nga dapat pamarisan. Para sa iya, ang kadalag-an nga nakuha sang kabataan ang umpisa sang pagangkon sang mas madamo pa nga kadungganan, kag kadalag-an kag nagpahayag man ang Gobernador nga handa guid ini maghatag sang suporta sa ila nga kinahanglanon para sa palaabuton pa nga preparasyon kag paindis-indis sang tig pumalasakop.
Sa nahibaluan ang Batang Pinoy ang isa ka National Youth Sports Program sang Pilipinas para sa mga atleta nga naga edad 15 anyos padalom kon sa diin 112 ka Local Government Unit ang nagpasakop sang tinalikdan nga tuig 2022 kag ang Capiz ang nangin rank 32.
Sa pihak nga bahin, guinhatagan man pagkilala kag insentibo ang 3 ka Capisnon nga nakakuha sang award sa guinhiwat nga Body building Competition sa syudad sang Iloilo nga sanday: Bryan Jerdee Francisco – Champion for Novice Short Physique, Champion for Open Short Physique, Overall Champion for Open Short Physique, Jan Milben Derayo – Top 8 sa Novice Short Physique, kag Top 10 sa Open Short Physique, kag Melbert Apuang nga nangin Top 9 Novice Short Physique.
Text and Images from Capiz Provincial Government Communications Group
4.5