Patay ang isa ka tuig nga bata nga lalaki matapos nga masunog sa sulod sang ila balay, sa Sitio Oakwood, Barangay Mongpong, Roxas City, subong gid lamang nga gab-i.
Sa interview sang Bombo Radyo kay Patrick Denobo, 20-anyos kag amay sang napatay nga bata nga si ‘Peter’ nagaisahanon nga ginbilin sini ang ila bata sa ila balay bangud ginsugat niya ang iya live-in partner nga si Maricar Bensing, 19-anyos, sa isa ka computeran sa ila gwaan.
Suno pa sa Mister, nga mga 15 minutos lamang ini nga nakalakat apang sa ila pagbalik, nagakalayo na ang ila balay kag wala gid matinguhaan nga masalbar ang ila bata.
Nahibaluan nga wala sila sang kuryente, rason nga kandila ang ila ginagamit, kag antes ini maglakat gintungtong niya ang kandila nga nabutang sa bubog nga baso, sa ‘durabox’.
Ginpahayag man sini nga wala niya gindala ang ila bata sa pagsugat sa iya live-in partner bangud nagakatulog ini, kag wala ginlauman nga masunog ang ila balay.
Nahibaluan nga wala pa mabunyagan si baby ‘Peter.’
Images from Bombo JP Aguillon
5