Duwa ka mga indibidwal ang na patay samtang 1 naman pilason, matapos nga guin balita nga ginpanglabo sila sa sulod sang ila puluy-an samtang nagakatulog takna alas 12:00 sang maga-aga kaina Setyembre 29, 2023 sa Barangay Lapaz, Jamindan Capiz.
Ang mga biktima ginkilala nga sanday Archie Georlin , 21-anyos, Dindo Georlin 31-anyos lunsay mga residente sang Himamaylan, Negros Occidental kag Rodel Catalan 24-anyos residente sang Masbate apang temporaryo nga nagapuyo ang mga ini sa Brgy. Lapaz sa nasambit nga banwa.
Ang suspek ang ginkilala kay John Villanueva Alyas Tatang, 22-anyos kag residente sang Himamaylan, Negros Occidental apang temporaryo man nga nagapuyo sa Brgy. Lapaz, Jamindan, Capiz.
Sa inisyal nga impormasyon nagikan sa Jamindan Municipal Police Station, ginpahayag takna alas 12:50 sang kaaganhon kaina sang nagpabalhag sang reklamo si Kagawad Ronalyn Llait sang amu nga Brangay nga may yara sang nagluntad nga pagpanglabo sa ila lugar.
Ginpahayag nga samtang nagakatulog ang mga biktima sa sulod sang ila guina istaran, hinali na lamang nga nagsulod ang suspek kag ginpanglabo ang mga ini.
Nakapalagyo si Archie Georlin rason nga nakapangayo sang bulig apang ginbawian naman sang kabuhi sanday Dindo Georlin kag Rodel Catalan bangud sa patal nga mga pilas nga ila naagum.
Padayon pa nga ginapadapatan sang bulong kag pagtatap si Archie Georlin sa Mambusao District Hospital kag guina patigayon man ang isa ka hot pursuit operation sang mga otoridad agud madakpan na si Villanueva matapos ini nakapalagyo.
4.5