MAY GUIN HATAG NGA TAG P200K PARA SA MGA LGU BILANG COUNTERPART SANG PROVINCIAL GOVERNMENT SA MGA AKTIBIDAD SA CAPIZTAHAN
Ini ang guin hambal ni board member Jose Fulgencio “Pepe” Del Rosario nga gindugangan sa karon nga tuig ang counterpart sang provincial government sa kada Local Government Unit (LGU) nga magapasakop sa aktibidad sang Capiztahan 2023.
Sa interview sang Bombo Radyo kay Del Rosario bilang chairman sang committee on tourism, ginpahayag sini nga ang nakasugtan nga kantidad nga counterpart sang gobyerno probinsyal amu ang P200,000 kag depende na sa LGU kun paano nila ini mapaigu-igo ukon madugangan sa kada aktibidad nga ila pagapartisiparan sa nagahilapit nga kahiwatan.
Pagagamiton sang mga LGU’s ang amu nga pondo para sa costume, pagkaon, transportation kag iban pa nga galastuhanon sa nagkalain-lain nga aktibidad.
Ginpahayag man ni Del Rosario nga sa 17 ka mga LGU’s lakip na ang Roxas City, may yara sang isa nga wala nagkumpirmar kun magapartisipar ini sa Capiztahan, apang wala na sini ginhingadlan.
Nahibaluan nga sumugod Abril 14 tubtob Mayo 1 ang pagselebrar sang Capiztahan subong nga tuig nga may tinutuyo nga mapaumwad ang turismo sa probinsya, pinaagi sa mga ginakalangkagan nga mga aktibidad kag programa sang lokal nga gobyerno sang probinsya.
News and text from Bombo Radyo Roxas
