Nagkalamatay ang 24 ka mga baboy sa isa ka piggery sa Sitio Paon, Barangay Cogon, Roxas City.
Suno sa tag-iya nga si Eric Gajopo, natalupangdan sini sang tinalikdan nga adlaw sang Domingo, Marso 26, nga nagapalangluya kag wala na sang gana sa pagkaon ang tatlo sini ka mga nayon nga baboy.
Nadiparahan na lang ni Gajopo pagkagab-i nga napatay na ang duha dire nga gilayon man sini nga ginpalubong.
Amat-amat naman nga nakalamatay ang iban pa lakip na ang gina-fattening kag mga urok.
Wala na nagduha-duha pa si Gajopo nga ilubong ang iban pa nga napatay apisar nga ginhingyo ini sang iya kalapit balay nga katayon na lang kag kunsomuhon.
Ginadudahan naman ni Gajopo nga posibli nalat-nan sang African Swine Fever (ASF) ang iya hinuptanan nga mga baboy bangud nga malapit lamang sa iya lugar ang kumpirmado nga kaso sa Barangay Dumulog.
Ginapaidalum na karon sa pag-monitor ang nabilin nga 18 ka mga urok ni Gajopo kag natalana nga pagakuhaan sang blood sample agud kumpirmahon kun ano ang gintunaan sa kamatayon sang mga baboy.
By: Jolito Valles Borda | March 29, 2023
