Ano ang “identity” sang CAPIZtahan?

Sa nagahilapit nga festival sang probinsya sang Capiz, nagalakot ang mga positibo kag negatibo nga panan-awan sang pumoluyo natuhoy sa CAPIZtahan.

Napulo kag apat n aka tuig (14 years) sumugod nga guinlunsyar ang CAPIZtahan nga kon sayuron (Capiz, ngalan sang probinsya kag Fiesta ukon Kapistahan), apang padayon ang mga palamangkutanon sa tagsa ka magpungko ako sa mga kapehan sa mall sa Arnaldo Boulevard, Paseo de Roxas kag sa akon gamay nga shop, ini tanan nahamtang sa Dakbanwa sang Roxas, kon ano guid ang “identity” sang CAPIZtahan festival.

Suno sa mga maniningad, interesante ayhan nga padolungan sang mga domestic travelers kag international tourist ang CAPIZtahan sang probinsya kasubong sang pagdagsa sang mga tawo sa Ati-atihan sang Kalibo, Aklan kag Dinagyang Festival sang Iloilo?

Ang mga pamangkot sa nasambit nga kahiwatan sang probinsya sang Capiz pagasabton sang mga guinbalay nga programa kag aktibidades sang gobierno probinsyal sang Capiz kon ini ayhan makaganyat sa pumoluyo kag mga bisita sang probinsya.

Guikan sa orihinal nga akbidades sang CAPIZtahan ano diri ang nagapabilin kag ano ang mga guinbag-o?

Kon may ara sang nabilin nga aktibidades sumugod nga guintukod ang CAPIZtahan, ano ini kag tuman na siguro kadaku ang guin umwad kag kon may mga nabag-o, ngaman kinahanglan bag-uhon kon ini ang duag nga nagalaragway sa festival?

Ang CAPIZtahan, ang kaadlawan sang pagtukod sang gobierno sibil sang probinsya sang Capiz sadtong Abril 15, 1901, ini kadungan sa paghanduraw sa nagtaliwan nga inanak sang probinsya sang Capiz nga si Presidente Manuel Acuña Roxas sang pungsod Pilipinas sadtong Abril 15, 1948 sa edad nga 56.

Suno sa akon pagpanalawsaw, aprubado sang Sangguiniang Panlalawigan sang Capiz ang ordinansa No. 02-S-2003, nga may tigulo “An act declaring April 15 of every calendar year as the foundation day of the province of Capiz and to celebrate said occasion with fitting activity.”

Madamo ang naga pamangkot ngaman wala sang “sadsad” sa CAPIZtahan kag madamu nga hubon nga naga patik-patik sang ila “drums” nga makaganyat kon tani sa pumoluyo nga nagapamiyesta para magkinasadya.

Hatagan naton sang ligwa nga malatag sang talatapan sang turismo sang gobierno probinsyal sang Capiz kag pribado nga sektor ang mga ideya nga nagakasantu sa pagsaulog sang tuigan nga festival sa Capiz.

Kon ang CAPIZtahan ang nagalaragway sang maragtas sang probinsya kag manggaranon nga kultura sang Capisnon, ano ang mga programa kag aktbidades nga mangin palatandaan para sang tuigan nga pagsaulog sang CAPIZtahan para sa Capisnon kag bisita nga magapadulong sa Capiz?