Arestado ang isa ka lalaki nga taga-Capiz matapos nakuhaan sang armas luthang sang kapulisan sa frisking area sang Dinagyang Festival sa syudad sang Iloilo.
Ginkilala ang nadakpan kay Alyas Bibong, 48-anyos, kag residente sang Barangay Balucuan Sigma, Capiz.
Suno kay Police Colonel Joeresty Coronica, Director sang ICPO, madagyang kuntani si Bibong apang sang ginrekisa, nakuhaan ini sang Caliber 45 pistol nga may magazine kag may pito ka bala.
Dugang pa ni Coronica, wala kahibalo ang suspek nga may rekisahanay sa iya ginkadtuan kag wala man nakahibalo nga may ginapatuman nga gunban.
Gilayon naman gin-aresto ang suspek bangud wala ini sang may nagakaigo nga papeles nga maipakita sa kapulisan.
Priso sa karon si Bibong sa Mandurriao PNP kag natalana pasakaan sang nakaigo nga panumbungon.