Mas ginhugot sa karun ang ginapatuman nga border checkpoint sa mga barangay sa banwa sang Maayon matapos makumpirmar ang kaso sang African Swine Fever (ASF) sa nasambit nga banwa.
Kaupod sang lokal nga gobyerno sa pagbantay sa nagkalain-lain nga border checkpoint ang mga katapo sang Maayon PNP, mga opisyal sang Barangay, Municipal Disaster Risk Reduction and Management Office (MDRRMO) kag iban pa nga katapo sang Municipal kag Barangay Taskforce ASF.
Katuyuan sang checkpoint nga wala sang makaguha ukon makasulod nga buhi nga baboy, karne ukon mga pork products nagikan sa mga lugar nga positibo sa ASF virus.
Isa ini sa mga tikang, agud madasig nga ma contain ang ASF kag indi na maglapta sa iban nga barangay.
Matandaan nga una na nagpatigayon sang disinfection sa apektado nga lugar sa Canapian ang mga opisyal sa pagpanguna sang Office of the Provincial Veterinarian agud masiguro nga indi na maglaton sa iban nga sapat ang virus.
By: Roldan Villareal | February 28, 2023
 sa nasambit nga banwa.){kind=link}