May clustering sang kaso sang balatian nga dengue ang barangay Candelaria sa banwa sang Tapaz, basi sa Provincial Dengue Case Bulletin.
Nagapatimaan ini suno sa Development Management Officer IV kag tagpamaba sang Department of Health (DOH) Capiz nga si Joeffrey Espiritu nga nakabalhag sang indi magnubo sa tatlo ka kaso ang nasambit nga barangay sa apat ka magkasunod nga morbidity weeks.
Talalupangdon man basi sa datos sumugod Enero 1 tubtob Marso 4, 2023, nagdangat na sa 35 ka kaso sang dengue ang nabalhag sa banwa sang Tapaz. Nagsaka ini sang 3,500 ka porsyento kumpara sa isa lang ka kaso nga nabalhag sa kapareho nga period sang 2022.
Kadungan sini ginpabutyag ni Espiritu nga nagapabilin sa gihapon nga epektibo nga pamaagi agud mapakigbatuan ang dengue amo ang pagsunod sa 4S strategy.
Suno pa sa opisyal, kinahanglan pangitaon kag tinluan ang mga lugar ukon butang nga mahimo itlogan ukon istaran sang mga lamok; magsuksok sang mahaba nga panapton ukon maghaplas sang mga repellant; kun may sintomas sang balatian, kapareho sang hilanat sa sulod na sang duha ka adlaw, gilayon magpakonsulta sa doktor; kag magpatigayon sang fogging sa tiun lamang nga mataas ang kaso ukon may outbreak sa isa ka lugar.
Pinaagi sini kag kooperasyon sang pumuluyo, malikawan ang padayon nga pagsaka sang kaso sang dengue sa probinsya sang Capiz.
By: Roldan Villareal | March 12, 2023
Lantawa nyo ang bag-o nga Capiztahan Theme song!
4.5