Capiz: Panan-awan para WVRAA 2023

Ano ang natabo sa performance sang delegasyon sang mga atleta sang Capiz sa 2023 Western Visayas Regional Athletic Association (WVRAA) Meet nga guinhiwat sa probinsya sang Aklan?

Ang probinsya sang Capiz ang masami nga yara sa ikatatlo nga pwesto sa WVRAA apang kon aton sipad-siparon ang aton medalya sa 2023 WVRAA, sa elementarya – 8-gold, 11-silver and 18-bronze para sa ika-apat nga pwesto nga guinpangunahan sang mga probinsya sang Iloilo (69-gold, 50-silver and 30-bronze), Negros Occidental (59, 52 and 40), kag Aklan (9, 22 and 49).

Sa sekondarya, ang probinsya sang Capiz nakatipon sang 6 ka bulawan nga medalya, 22 ka pilak kag 56 ka saway, kon sa diin ikaanom sa 6 ka probinsya nga nagpasakop.

Tuman kasubo ang ini nga “performance” sang aton atleta, madamu sang kamot nga nagatudlo, may mga tinaga sang pagpangbasol kag pagpanginluwas apang isa ka lang ka tinaga ang nagakasantu, nahuy-ang Capisnon sa patag sang hinampang.

Kon balikan naton ang maragtason nga kampeonato sa Natundan sang Kabisayaan kon sa diin kalakip pa sadto ang probinsya sang Romblon, ang probinsya sang Capiz ang nagkampeon sang tuig 1962.

Indi naton makumpara ang 1962 sa 2023 bangud 61-anyos na ang nakaligad kag guinpataas na sang probinsya sang Negros Occidental, Iloilo, Aklan, Antique kag Guimaras ang ila paghanas sa mga atleta.

Ang WVRAA guinakabig nga DepEd sports event apang ngalan sang probinsya ang nakataya kag ang guinawagayway nga hayahay probinsya sang Capiz.

Ngaman indi naton liwat bisitahon ang aton “performance” sa nakaligad nga lima ka tuig nga WVRAA, ano bala ang kakulangan (Budget, trainings, competent coach, standard sports equipment, scouting, exposure with appropriate budget, ceiling height/weight, qualifying standard and most of all non-political sports program).

Kinahanglang naton ang pagpangalap sang maayo nga humalampang pinaagi sa mga lehitimo nga sports program sang kabarangayan, munisipyo kag pribado nga organisasyon.

Apang mahimo ini kon mabalay ang isa ka sinsero nga programa sa isports kag mahatagan sang nagakaangay nga pondo agud malab-ot ang isa ka handum padulong sa madinalag-on nga Capiz.

Ipagkit namon diri ang nangin medal standing sang Capiz sa elementarya kag secondary para sa 2023 WVRAA.

Ikaw bilang taxpayer nga Capisnon, kuntento ka bala sang nangin “performance” sang Capiz sa 2023 WVRAA? Ano ayhan ang nangin kakulangan sang DepEd? Ano ang dapat nga suporta nga ipalab-ot sang probinsya? Ano naman ayhan ang aton lauman sa 2024 WVRAA?