Nagdugay sang lima ka minutos ang pagbayluhanay sang lupok sang mga katapo 12th Infantry Battalion kag rebelde nga grupo sa Sitio Liboton, Barangay Duran, Dumalag, Capiz.
Suno kay Police Major Cherryl Visto, hepe sang Dumalag PNP, natabo ang insidente pasado alas 5 ang takna kaina sang aga kag ginapahayag indi magnubo sa lima ka armado nga persona ang na-engkwentro sang militar sa nasambit nga lugar.
Maswerte nga wala sang napilasan sa miyembro sang militar kag nadalahig nga mga sibilyan samtang indi pa matumod kun may pilason sa grupo sang mga rebelde nga madasig man nga nag-atras.
Ginapatihan nga nagpalagyo sa bahin sang Sitio Bolo sang nasambit nga barangay ang mga rebelde nga padulong naman sa nabukid nga bahin sang Barangay Taslan sa banwa sang Dumarao.
Dugang pa ni Visto may mga narekober sa ginluntaran sang engkwentro apang indi pa sa karon mapalayag sa nagapadayon nga clearing operation sang Philippine Army.
Ginpanugyan man sang hepe sa pumoluyo nga mangin vigilante sa ila palibot kag gilayon ipalab-ot sa otoridad ang makaduluda nga persona sa ila lugar.
By: Jolito Valles Borda | February 17, 2023
5
4.5