KARAMBOLA
Manami guid man ang sabor sang kape kon padayon ang diskusyon natuhoy sa politika labi na sa palaabuton nga 2025 midterm elections.
Ang haka-haka, sin-o sa duha ka former mayor sang Dakbanwa sang Roxas ang mangin kasumpong ni incumbent mayor Ronnie T. Dadivas, si former mayor Tony del Rosario ukon si former mayor Alan Celino?
Nakibot ako, samtang naga-inom sang mainit nga kape sang guinhatag sang isa ka beterano nga komentarista sang kapehan ang iya panan-awan sa “probable gubernatorial showdown.”
May posibli nga engkwentro sa Gobernador?Â
Ano ayhan ka matuod nga isa ka last termer public official sang first district kag last termer nga mayor sang second district ang mangin tandem sa Gobernador kag Bise Gobernador batuk sa tiket ni Governor Fredenil H. Castro kon padayon ang karambola sang linyada sa politika.
Apang, suno sa mga “political observers,” may local coalition ang Lakas kag Liberal Party (LP) sa probinsya sang Capiz, ina koalisyon lang sang partido apang ang tagsa-tagsa may kinaiya nga handum, panan-awan kag interes sa pagserbisyo.
Madamo man sang pamangkot sa apat ka kanto sang kapehan, kon sin-o ang mangin bise-gobernador ni Governor Castro sa 2025, magapabilin ayhan si last termer Vice Gov. James “Mitang” Magbanua ukon si Mayor Raymond “MonMon” Malapajo sang banwa sang Maayon kag presidente sang League of Municipalities of the Philippines (LMP)-Capiz Chapter?
Ano man nga opinyon sa politika, nagapabilin nga isa ka panan-awan guikan sa naga-alindakal nga kainit sang kape.
Ikaw, ano ang panan-awan mo sa politika sa inyo banwa?