Maski diin ka lang mangape sa Dakbanwa sang Roxas, laban nga guina “sawsaw” sa istorya ang posibli nga congressional showdown sa first district sang probinsysa sang Capiz, Congressman Howard Guintu sang Pinuno Party List batuk kay Paolo Roxas sang Partido Liberal.
Suno sa mga komentarista, samtang guinahulat nga maglamig ang nagabalingaso nga kainit sang kape, guinalantaw nila kon sin-o ang may bentaha sa Dakbanwa sang Roxas nga may katumbas nga kapin sa apat ka banwa nga botante.
Indi manigaran nga kon magdaog ka sa Roxas City kag banwa sang Panay, halos nagalagas nalang ang imo kasumpong, apang ang tanan wala sang kasiguruhan, samtang indi matapos ang inisipay sa ti-on sang pinili-ay.
Indi naton pagkalipatan ang mga numero sang barangay nga sakop sang tagsa ka komunidad, Roxas City may 47, Maayon may 32, Panay may 42, Panitan may 26, Pilar may 24, Pontevedra may 26, kag President Roxas may 22.
Sa 219 ka barangay, 6 ka munisipyo kag isa ka syudad, tanan sakop sang primero distrito sang Capiz, sin-o ang may bentaha kay Guintu kag Roxas para sa 2025 midterm elections?
Sin-o ang mga incumbent mayors sang nasambit nga LGU’s kag sin-o ang ila suportahan, Mayor Ronnie T. Dadivas sang Roxas City, Mayor Raymond Malapajo sang Maayon, mayor Vicenet Bermejo sang Panay, Mayor Katherine Belo sang Panitan, Mayor Arnold Perez sang Pilar, Mayor Henry Tumlos sang Pontevedra, kag Mayor Receliste Escolin sang President Roxas.
Hambal sang isa ka maniningad, sa sini nga pagtaksanay sang puwersa sa politika, kinahanglan ang kaalam sa istratehiya kon paano gamiton ang kwarta kag makinarya, lakip na diri ang political propaganda nga magahatag impormasyon kag kondisyon sa pumoluyo.
May pila ka opinyon ang guinlatag sa kapehan, dapat ibanan nga mga naga-upod nga mga “epal” kay Howard kag Paolo, suno sa ila, indi plus factor.
Ano man ang ila puwersa kag handum para sa primero distrito, importante nakadesinsyo ang mga programa para sa kinahanglanon sang mga tawo.
This is a real battle of political strategy, connections, machinery, propaganda, kag iban pa.