MARAGTAS

Samtang naga pangape ako sa isa ka mall, na istoryahan ang pagtukod sang “Maragtas Foundation” nga magapatikasog sang aktibidades sa probinsya sang Capiz labi na ang CAPIZtahan.

Naghatag sa akon sang interes nga magpamati sa mga ‘marites’ kag ‘maritso’ natuhoy sa “Maragtas Foundation,” kag didto ko nahibaluan sang guinpakita ang litrato guikan sa social media sang mga personalidad nga magabug-os sini, lunsay mga negosyante kag respetado sa dakbanwa sang Roxas kag probinsya sang Capiz.

Sa personal ko nga panan-awan, dalayawon ini nga tikang ni Capiz Governor Fredenil H. Castro bangud gusto niya nga ipahamtang ang aktibidades sa “non-political” kag magapadulong sa malapad kag malawig nga pagdumalahan maski sin-o man ang maga pungko nga Gobernador sang probinsya.

Sa sini nga sitwasyon, guinpakita sang Gobernador ang iya tampad nga paghigugma sa Capiz kasubong sang iya panawagan sumugod sang siya pa ang tiglawas sang segundo distrito sang Capiz, GUGMA ni Castro kag ini amat-amat niya guinapabatyag ang GUGMA kag liderato para sa mangin buasdamlag sang probinsya sang Capiz.

Nagapati man ako, sa dili madugay matawo na ang pagkilala sa CAPIZtahan bilang mother of all festival in Capiz kag mahatagan sang “identity,” kon ano ang selebrasyon sang CAPIZtahan nga kinahanglan padolungan sang mga domestic traveler kag international tourist.

Sa sini nga kaangtanan, ang mga Capisnon in abroad kag ara sa iban nga parti sang Pilipinas ang maga early booking na sang ila sea travel and plane ticket agud saksihan kaupod ang ila mga pamilya sa probinsya ang pagka pinasahi nga CAPIZtahan nga mangin tuigan nga pagsaulog sa Capiz.

Ang CAPIZtahan, maga simbolo sa pagsaulog sa bilog nga probinsya kalakip na ang napulo kag anum (16) ka munisipyo kag indi lang sa edipisyo sang Kapitolyo.

Kon tani mabati-an ang dulolungan nga mga tunog sang drums sa primer distrito kag segundo distrito bilang pamukaw-pukaw nga nagahilapit na ang CAPIZtahan kasubong ang pagkabit sang mga maduagon nga banderitas nga simbolo sang kapistahan sa komunidad.

Ilatag naton ang mga produkto guikan sa Capiz kasubong sang mga malagkit, pagkaon guikan sa dagat, kararuton, homemade products, kag madamo pa nga pwede hambalon sang bumalakal nga guikan ina sa probinsya sang Capiz.

Kabay nga mapadayon ang pagkilala sa maragtas kag manggaranon nga kultura sang Capisnon para mangin panublion nga kinaalam sang masunod nga henerasyon.

Ang ini nga tikang isa ka daku nga respeto sa pumoluyo nga indi sa tanan nga oras may “motibo sang politika,” kag diri ako nagapati nga nagapangibabaw ang GUGMA ni Governor Castro sa Capisnon kag sigurado nga ang ini nga maayo nga tikang ang mapagkit sa maragtas sang festival sa Capiz.

Ini na kon tani ang umpisa kag indi ang mangin katapusan sang guinsuguran.