Arestado ang 26-anyos nga lalaki sa ginkasa nga drug buy-bust operation sang otoridad sa Barangay Bitoon Ilaya, Cuartero, Capiz.
Ginkilala ang nadakpan nga si Emmanuel Prebaldos kag residente sang Barangay Sta. Rita banwa sang Dumalag.
Narekober sa paghinakop ni Prebaldos ang 12 tanan ka sachets sang ginapatihan shabu, cellphone, slingbag kag P7,000 nga buy bust money.
Nagabug-at sang 56 gramos ang nakumpiskar nga shabu kag nagabalor sang P401,200.
Mahibaluan, ginakabig nga High Value Individual (HVI) kag top 10 sa watchlist sang probinsya ang nasambit nga suspek.
Nakahunong na sa karsel sang Cuartero PNP si Prebaldos kag natalana nga pasakaan sang nagakaigo nga panumbungon.
By: Jolito Valles Borda | February 23, 2023
5