Maisog nga ginsiling sang isa ka Senador, nga daw kaangay wala sang ginakahadlukan sa karun ang mga smuggler kag hoarder sang produktong pang-agrikultura ilabi na ang sibuyas apisar nga si President Ferdinand ‘Bongbong’ Marcos Jr., ang nagatindog bilang Sekretaryo sang Department of Agriculture (DA).
Suspetsa ni Senador Sherwin Gatchalian, mabaskog nga mga indibidwal ang nagamanipula sa suplay sang sibuyas, bangud wala ini sang kahadlok apisar nga nakatutok ang Presidente sa nasambit nga ahensya.
Bangud diri, nagtukod na sila sang inter-agency task force sa diin ginakalakipan sang pila ka mga ahensya sang gobyerno kaparehas sang National Bureau of Investigation kag Philippine National Police, agud mahadlok ang mga hoarder.
Mahibaluan sadtong Disyembre lamang, nagpadulong si Gatchalian sa talatapan sang Bureau of Customs (BOC), agud magpatigayon sang ocular inspection kag walk-through sa modernization program sang BOC, dala sang nagapadayon nga pagdaguso sang mga produkto nga pang-agrikultura sa pungsod.
Kadungan sini, gintukuran naman ni AGRI party-list Rep. Wilbert Lee, ang pagpatigayon sang pagsinapol sang Kamara de Representantes angut sa smuggling.
Samtang, nagkonsulta naman ang House Committee on Ways and Means sa Institute for Solidarity in Asia, agud matumod ang mga pagbag-o nga kinahanglanon sa Bureau of Customs (BOC), agud matuldukan na ang agricultural smuggling sa Pilipinas.
Magluwas sa pagpasaka sang kaso sa mga maulamid nga empleyado sang gobyerno, ginhatagan man sang pagtamud ni Lee ang kinahanglanon nga pabaskugon ang Office of the Assistant Secretary for Inspectorate and Enforcement sa idalum sang National Food Safety and Food Security Agency, agud matigayon ang ila nga mandato.
Kumpiyansa naman si House Committee on Agriculture and Food chairperson kag Quezon Rep. Mark Enverga, nga masolusyunan sang administrasyon ni Marcos, ang nagapadayon nga smuggling sang produkto nga pang-agrikultura sa pungsod.
Text by: MVF
5
4.5