Suno sa Circular Letter sang aton Arsobispo, kinahanglan nga saulugon naton ang fiesta sang aton mga patron sa mga parokya, mission stations, kag mga kapilya sing may pagpasalamat sa ila pagtabang kag pagpamalandong agud mailog naton ang ila pagkabuhi, kag debosyon sa pagpangayo sang ila pag-ampo.
Apang bangud sang mga panghangkat sang moderno pagginawi kag paino-ino nga nagapahilayo sa minatuod nga tinutuyo sang selebrasyon, ginapakamaayo sang aton Arsobispo, His Excellency, The Most Rev. Victor B. Bendico, D.D., nga pahanumduman kag tuytuyan kita pinaagi sa paghatag sang pila ka mga pagsulundan, nga sadto pa nga daan ginapatuman na sa aton lokal nga Simbahan diri sa Arkidiyosesis sang Capiz.
Amo ini ang mga masunod:
1. Ginadumilian ang mga binayle sa vispera sang mga parokya, mission stations, kag mga kapilya;
2. Kon may binayle sa vispera sang parokya ukon mission station, wala sing Misa Solemne sa adlaw sang fiesta.
3. Kon may binayle sa vispera sang kapilya, wala sing Misa Cantada sa adlaw sang fiesta.
4. Sa baylo, Misa Rezada lang ang pagasaulogon sang pari.
Subong man, ginapakamaayo sang aton Simbahan Lokal nga dumili-an ang paghiwat sang mga MISS GAY CONTEST, BIKINI OPEN CONTEST, kag sang iban nga mga kasubong sini, sa mga inadlaw antes ang fiesta kag sa adlaw mismo sang fiesta sa aton mga parokya, mission stations, kag mga kapilya.
Ginapakamaayo ang paghiwat sang mga programa nga nagapasanyog sang kultura kag Wala naga-agaw sang minatuod nga espiritu sang selebrasyon.
