Naglab-ot sa mas o menus P1.7-M ang balor sang ginaalegar shabu nga nakumpiskar sang mga katapo sang Station Drug Enforcement Team (SDET) Roxas City sa isa ka miyembro sang LGBTQ pinaagi sa ginkasa nga drug buybust operation sa Barangay V, Roxas City.
Ginkilala ang arestado kay Richard Ferrer alyas ‘Cherry’, 38-anyos, residente sang Barangay Tiza, sini nga syudad.
Sa interview sang Bombo Radyo kay Police Lieutenant Colonel Francisco Paguia, hepe sang Roxas Component City Police Station, ginkakibot sini ang binulto nga sachet sang ginaalegar shabu nga nakuha sa suspek bangud ginakabig lang ini nga street level individual (SLI).
Natigayon nga nadakpan si Ferrer pinaagi sa isa ka pulis nga nagpakuno-kuno nga poseur-buyer, isa ka sachet ang ginbaligya sang suspek sa baylo sang P2,000 nga buybust money.
Pahayag pa ni Paguia, nga madugay na nga ginamonitor ang hulag ni Ferrer bangud sa mga impormasyon nga nababaton sang kapulisan nga nagaserbi ini nga source kag nagabaligya sang shabu.
Nakuha sa posesyon ni Ferrer ang ginabulubanta 250 grams nga ginapatihan shabu kag drug paraphernalias.
Magapangatubang sa panumbungon nga paglapas sa Republic Act 9165 ukon Comprehensive Dangerous Drugs Act of 2002 ang nasambit nga suspek.
Sa karon, yara na ini sa kustodiya sang Roxas City PNP para sa nagakaigo nga disposisyon.
Images used are from free stock photos online. | News text is from Bombo Radyo Roxas
 Roxas City sa isa ka miyembro sang LGBTQ){kind=link}