Imbestigaran sang Sangguniang Panlalawigan ang pag-usar sang calamity fund sang probinsya sa pagbakal sang Remdesivir nga bulong kag pagpatukod sang istasyon sang radyo gamit ang special education fund sang nagligad nga Contreras administration.
Ini ang nakasugtan sang mga katapo sang SP kasunod sang gindul-ong nga diskurso pribiliheyo sang tagpamuno sang Committee on Education kag Committee on Health nga si Board Member Thea Faith Reyes nga naga kwestyon sa pamaagi sang pag-usar sang pundo sang nagligad nga administrasyon.
Dako nga palamangkutanon suno kay Reyes kun ngaa ginkuha sa calamity fund sang probinsya ang ginbakal sang nagpalanubra nga remdesivir nga ginagamit sang Roxas Memorial Provincial Hospital (RMPH).
Makabig man nga uyang sang pundo ang pagpatindog sang wala na mapuslan nga Kabalaka radio nga gingamit lamang para sa political propaganda ni anay Governor Esteban Evan Contreras.
Nagapati si Reyes nga kun indi garuk, indi palpak, kag husto lang ang diskarte sa pagdumala sang nakaligad nga administrasyon, madamu nga Capisnon ang nabuligan sang pundo sang probinsya.
Ginahangkat man sang opisyal sanday anay gobernador Contreras, anay Provincial Administrator Edwin Monares, anay hepe sang RMPH nga si Dr. Edmarie Tormon kag anay head sang PDRRMO nga si Judy Grace Pelaez nga sabton ang nasambit nga mga isyu.
Sa karun ginatinguhaan pa sang Radyo Bandera nga makuhaan sang pahayag ang kampo sang mga natungdan.
5
4.5