Kon mamati kalang sa mga kapehan sa sulod sang mall (Pueblo de Panay kag Arnaldo Boulevard, Roxas City), isa kag duha ka bahin ang imo mabati-an apang kon magpanglugayawan ka, imo makit-an ang kamatuoran.
Sa Dakbanwa sang Roxas imo masaksihan ang padayon nga pagnagtag sang bugas sa kabarangayan lakip na ang wala untat nga implementasyon sang proyekto kon sa diin imo mabasahan sa karatula “The Project of the People of Roxas City,” wala ngalan sang politiko kag ini ang tama kay ina guikan sa buwis sang pumoluyo.
Suno kay “Lola Neneng” sang Barangay Baybay, Dakbanwa sang Roxas tama ang panawagan sang alkalde, “UPOD KITA” padayon sa progreso.
Apisar sang masako nga hilikuton sa palaabuton nga CAPIZtahan 2023, padayon ang pagpatigayon nga mahuman ang mga proyekto sa kabanwahanan sang probinsya sang Capiz, kalakip na dira ang pagpakay-o sang provincial roads, konstruksyon sang pang-gobierno nga edipisyo, programa para sa palamugnan sang mga tawo kag libre nga edukasyon sang kabataan nga mangin sandigan sang tagsa ka pamilya para sa masanag nga buasdamlag.
Sa karon, imo mabatyagan nga amat-amat guina-panday ang pagbalay sang isa ka okasyon nga mangin hilikuton sang tagsa ka Capisnon para sa karon kag sa palaabuton nga CAPIZtahan sang probinsya sang Capiz.
Liwat nga guinabuksan guikan sa pinanid sang maragtas sang Capiz ang mga hitabo nga kabahin sang aton nga kultura kasubong sa pagsuksok sang mga panapton sang “Katipunero, Katsila, Amerikano, Hapon kag moderno nga Capisnon.”
Dugang diri, ang tuman katahum nga mga tunog Capiznon guikan sa lalantunon nga makapa yuhum sa nawong sang Capisnon kag dumoluong.
Kalakip na diri, ang ideya ni Governor Fredenil H. Castro nga ilatag ang mga produkto sang Capisnon guikan sa manggaranon nga kabukiran kag kadagatan kasubong sang pagpasundayag sang aktibidades kag manggaranon nga kultura sang Capisnon.
Ang ini nga mga tikang sang Gobernador ang santu sa iya panawagan “GUGMA” para sa buasdamlag sang Capiznon.
Ano ayhan, kon mangin isa ang panawagan sang Gobernador sang probinsya sang Capiz kag alkalde sang Dakbanwa sang Roxas, “GUGMA, UPOD KITA!” para sa mapagros nga buasdamlag sang probinsya sang Capiz kag kauswagan sang Dakbanwa sang Roxas.
Kon padayon ang pagbinuligay sang pribado nga sektor kag ahensiya sang gobierno kag mangin tayuyon ang paghangpanay sang lideres sang tagsa ka lokal nga gobierno, isa ka madinalag-on nga buasdamlag ang maagom sang Capisnon.
4.5
5