Hugot nga ginpanginwala ni Police Captain Gary Diaz Chief of Police sang Panay, ang alegasyon nga planted ang ila ginpatigayon nga search operation sa puluy-an ni Barangay Kagawad Alejandro ‘Bared’ Baselonia.
Sa interview sang Bombo Radyo kay Diaz, ginpahayag sini nga wala sang kamaturan ang mga alegasyon sang pamilya ni Baselonia nga nagdiretso sila sulod sa puluy-an kag nagpang-ukay sang kagamitan.
Suno pa kay Diaz nga alas 5:00 sang aga na sila nag-abot sa amu nga lugar kag kaupod ang pila ka mga witness kag didto nagpangayo sila sang pahanugot sa asawa sini nga magpatigayon sang search operation.
Dugang pa sang Chief of Police nga nagaba-se lamang sila sa mga panaysayon sang mga pumuluyo sa lugar kag record sang Kagawad nga suno diri masami ginagamit ang amu nga armas luthang agud ipangtaya kag ipahog.
Mahibaluan nga sadtong tinalikdan nga tuig, may yara ini sang kasubong nga reklamo kag wala nagpa-areglo rason nga may record ang amu nga Kagawad.
Matandaan nga nakuha sa paghinakop ni Baselonia ang 1 ka unit sang .45 caliber pistol nga may isa ka magazine kag apat ka mga bala; 1 ka unit sang 12 gauge shotgun nga may 1 ka bala sa ginpatigayon sang search operation sang Panay PNP.
Sa karun, natigayon na nga mapasakaan sang kaso nga pagpalas sa Republic Act 10591 under the “Comprehensive Firearms and Ammunition Act” ang amu nga Kagawad.
Mensahe ni Diaz sa mga nagahupot sang indi lisensyado nga armas luthang, isungka sa ila talatapan agud indi na makadisgrasya kag magamit sa indi maayo nga buluhaton.
4.5
5