PEKE NGA MGA SIGARILYO, NAKUMPISKAR SANG OTORIDAD SA BRGY. V, SINI NGA SYUDAD
Nakumpiskar sang mga otoridad ang kinarton nga ginapatihan peke nga mga sigarilyo, sa Capricho Uno bldg.., Legaspi St., Brgy. V, Roxas City.
Pinaagi sa search warrant nga ginpirmahan ni Hon. Esperanza Isabel Poco-Deslate, Executive judge sang Regional Trial Court, 6th Judicial Region, Roxas City, natigayon nga matsekyar sang mga katapo sang Regional Intelligence Division ang sulod sang bodega nga ginarentahan sang subject person nga si Qing Zong Li, isa ka Chinese national.
Nakuha sa kustodiya ni Li ang nagkalain-lain nga brand sang sigarilyo kaangay sang Mighty, Marlboro, Fortune, Marvels, Chesterfields, Jackpot kag iban pa.
Wala man sang mahatag nga komento ang nasambit nga Chinese national.
Sa interview sang Bombo Radyo kay Punong Barangay Aileen Leones sang Brgy. V, ginkakibot sini ang pagkadakop sa amu nga persona kag wala ginlauman nga may peke nga sigarilyo ini nga negosyo.
Sa karon, ginpangdala na sang mga otoridad ang mga nakumpiskar nga mga peke nga sigarilyo kag pagagamiton bilang ebidensya sa pagpasaka sang nagakaigo nga kaso sa nadakpan nga persona.
4.5
5
5