PEN PEN DE SARAPEN for July 11, 2024 | Blind Items sa Capiz News

0
70
PEN PEN DE SARAPEN for July 11, 2024 | Blind Items sa Capiz News

Pen Pen de Sarapen

July 11, 2024

Konsultasyon ni Bol

Isa sa naghatag igtalupangod sa pumoluyo sang Segundo distrito ang pagpanglugayawan sa kabanwahanan sang isa ka Capisnon nga guinakabig isa ka “political figure.”

Ngaman nagapatigayon siya sang konsultasyon sa mga dalagku nga pamilya kag lideres sang Segundo distrito sang probinsya sang Capiz?

Halangpon ang mga tikang ni “Bol” sa Segundo distrito, ano ayhan ang iya plano sa politika sa 2025?

Napaslawan man sadto si “Bol” sa iya gubernatorial bid, nagapati naman ang iya mga kaalyado nga daku gihapon ang iya tsansa.

Anong masiling mo Bolano Juan?

“MnM” para bise-gobernador?

Isa man sa mainit nga guina istoryahan sa kapehan ang mangin puwesto para sa bise-gobernador sa probinsya sang Capiz.

Ano ang status ni incumbent Vice Governor Jaime “Mitang” Magbanua, tapuson niya ang iya termino sa pagka bise-gobernador ukon may iban nga puwesto nga para sa iya sa 2025?

Madamo ang naga pinamangkot kon ano ang huyog ni former Governor Esteban Evan “Nonoy” Contreras sa iya pagpanglakaton sa kabanwahanan sa probinsya sang Capiz.

Suno sa mga marites kag marisol sa kapehan, si Nonoy padayon nga naga pamulso kon ayhan pwede siya nga mangin gobernador, bise-gobernador kag alkalde sa banwa sang Pontevedra, ano sa banta ninyo ang political comeback ni Nonoy?

Madamo ang nagapinamangkot sa barber shop, merkado publiko kag sa mga pagtililipon kon ano ang dalaganan ni Mayor Raymond “MonMon” Malapajo sang banwa sang Maayon sa 2025.

Si “MonMon,” ang presidente sang League of Municipalities of the Philippines (LMP)—Capiz Chapter kag Presidential Adviser on LMP Corporate Affairs sa idalom sang administrasyon ni President Ferdinand “Bong-Bong” Marcos Jr.

Madamo na nga pagtililipon nga ara si Governor Fredenil “Oto” Castro, kag may pila ka pagpahapyaw sa iya mga pamulong-pulong kon sin-o ang iya gusto nga mangin bise-gobernador.

Apang isa lang ang pamangkot kag sabat, sin-o guid ang mangin bise-gobernador ni Governor Castro sa 2025?

Let’s wait and see, kon diin ihatag ang Gugma ni Castro.

One-on-one sa Panay!

Sa liwat nga pagbagting sang politika sa maragtason nga banwa sang Panay, mapukaw ang tagsa ka prinsipyo kag matakos ang sinseridad sang mga tawo sa ila pagapili-on nga mangin lider sang 42 ka barangay.

Indi malipod sa tanan, ang duha nga guina sigahum nga maga engkwentro sa pagka alkalde sa Panay, ang parehas nga mga may malawig nga eksperyensya sa politika kag pagpanerbisyo sa pumoluyo.

Si incumbent Mayor Vicente “Toto” Bermejo, nangin OIC-mayor sang 1986 kag napili-an nga alkalde sang Panay sang 1988, nangin LMP President sang Capiz, Centennial Governor sang probinsya kag nangin City Mayor sang dakbanwa sang Roxas, bag-o liwat nagbalik sa pagka alkalde sa Panay.

Si last termer Board Member Jonathan “Sonny” Besa, napili-an sadto nga senior board member sang Capiz kag isa man sa may maayo nga rekord sa hunta probinsyal, kag labi nga nagmarka ang iya panindugan nga papag-unon ang adbokasiya kontra sa pagmina sa probinsya sang Capiz.

Ang ila mga adbokasiya halos nagatandog sa balatyagon sang Pana-ayanon, kasubong sang “Hidlaw Panay” ni Mayor Vic, nagapahayag nga nahidlaw siya sa Panay kag guinakahidlawan man sang Panayanon ang iya istilo sang pagpanerbisyo.

Madamo nga Panayanon ang nagsiling nga “Serbisyo ay Mabesa” ni Board Member Sonny, labi na sa Panayanon nga nagakinahanglan sang iya serbisyo, padayon niya nga guinahatag sa pumoluyo ang serbisyo nga masarangan sang iya talatapan.

Kon madayon ang one-on-one political showdown sa banwa sang Panay, kamo na nga Panayanon ang mag binag-binag kon sin-o ang inyo gusto nga mangin lider sa 2025.

Maragtason nga desisyon para sa Panayanon!

LEAVE A REPLY

Please enter your comment!
Please enter your name here