TATC parking area may barker?
Ang parking area sa Teodoro Arcenas Trade Center (TATC) nga guinatumod naton kon sa diin sa natung-an sang Plaridel Street kag San Roque Extension, sa atubang sang gate sang Plaridel East and West Elementary School kalakip dira ang isa ka bangko, grocery stores, construction supplies kag kalan-an.
Okey lang tani kon wala sang pinili-an, kon motorsiklo kag tricycle wala sang bakante ang masami nga guinahambal sang mga natungdan apang kon 4-wheel drive maabtik sila magpito kasubong nga natingala ang mga tawo nga nagdamo na ang katapo sang traffic enforcer.
Responsibilidad ini sang mga traffic enforcers, ngaman kinahanglan dira ang mga barker samtang may mga traffic enforcer nga guina swelduhan sang pumoluyo?
Pen Pen de Sarapen, pito’ lang, buklad palad, tip dayon. Kusmod pa kon P5.00 lang.
Pabahay politika
Amat-amat na nga guinabuksan ang palamangkutanon sa programa sa pabahay sa mga munisipyo.
Para kay sin-o ang pabahay kag ano ang kwalipikasyon sang benepisyaryo?
Hambal sang kilala ko, prayoridad ang pumoluyo nga ara sa “danger zone” kag ang mga wala sang balay kay kabahin sila sa mga kubos nga pamilya.
Apang ano ka matuod, kon ang sertipikasyon sang politiko ang basehan sang pabahay program para sa iya mga kaalyado sa politika kasubong ni Kapitan, S.B Member kag sang naghatag sang suporta sa iya sang nagligad nga eleksyon, paano na ang ara sa “danger zone,” wala lang sila mabutang sa delikado nga sitwasyon, nawad-an pa sila sang pabahay bangud guinbag-o ang titulo sang programa, pabahay politika.
Pila pa ka pamilya ang ara sa “danger zone” nga wala mahatagan sang pabahay?
Ano naman kadamo sang mga kaalyado sang politiko nga benepisyaryo sang pabahay politika?
Pen Pen de Sarapen, ipaambit naton sa pumoluyo ang minatuod nga programa indi ang inyo personal nga programa, ang pabahay politika.
Traffic signs, makaholubog!
Masami naton makit-an ang mga traffic signs sa kabarangayan, kabanwahanan kag sa syudad nga may nakabutang “NO PARKING, ONE WAY, NO LOADING/UNLOADING, AMONG OTHERS,” apang nakakabit ang ngalan sang makaholubog nga produkto.
Kinahanglan bala himuon ini nga advertisement signs sang isa ka produkto nga makaholubog?
Wala ayhan sang pondo ang lokal nga gobierno para sa traffic signs?
Pen Pen de Sarapen, kinahanglan sang mga commuter para sa traffic signs ang makaholubog nga ilimnon?
KALUBIHAN SA KAMAISAN
Kon mapatuman ini nga programa sang seryoso sa tagsa ka banwa sang probinsya sang Capiz, daku ang mangin epekto agud mapahagan-hagan ang madasig nga pagpanaog sang tubi guikan sa kabukiran nga nagatuga sang baha sa manubo nga parti sang komunidad.
Pen Pen de Sarapen, tani untaton na ang illegal logging kag ang lamharon nga pag-utod sang kalubihan nga mangin kabahin sang sikat nga “coco lumber.”
