Nadakpan sang mga otoridad ang pila ka indibidwal nga yara sa likod sang ginatudlo nga isa sa mga investment scam sa Roxas City, Capiz.
Una nga nadakpan kahapon nga adlaw si Myla Mendoza Collado, 50 anyos sang Barangay Barra, Roxas City.
Samtang ginserbihan sang warrant of arrest sang Bago City Police Station sa Negros Occidental ang mag-asawa nga Engie Esteves kag Jekha Esteves.
Sunod naman nga ginserbihan sang warrant of arrest kaina sa sulod sang Bureau of Jail Management and Penology (BJMP) sa Barangay Handumanan sa syudad sang Bacolod si Henjie Noble Cuadra, 37 anyos.
Si Collado, Cuadra kag mag-asawa nga Esteves ang pila gid lamang sa mga persona nga ginpasakaan sang panumbungon nga Syndicated Estafa bangud sa pagbaton sang mga ini sang investment para sa RGS online marketing, apang napaslawan nga mabalik ang kwarta.
Si Cuadra naman ang ginakabig isa sa mga founder sang nasambit nga investment scam nga una na nadakpan sang nagligad nga tuig bangud sa kapareho nga kaso.
Ang warrant of arrest batuk sa mga arestado ang gin-isyu ni Judge Esperanza Isabel Deslate sang Regional Trial Court,Branch 19 sa syudad sang Roxas nga na petsahan sang Enero 30, 2023. Wala sang piyansa nga ginrekomendar ang korte para sa kahilwayan sang mga akusado.
By: Roldan Villareal | February 1, 2023
5
4.5