REDEVELOPMENT PROJECT SANG PEOPLES PARK MAGASUGOD NA SUBONG NGA BULAN

REDEVELOPMENT PROJECT SANG PEOPLES PARK MAGASUGOD NA SUBONG NGA BULAN; MGA MANUGBALIGYA SA AMU NGA LUGAR GINAGANYAT NGA MAGBALHIN TEMPORARYO PARA SA PAGSUGOD SANG CONSTRUCTION – KAP OROCEO

Amat-amat na nga ginpalibutan sang kodal ang People’s Park, Baybay para sa pagsugod sang redevelopment project sang city government sini nga bulan sang Enero.

Ini ang ginpahayag ni Punong Barangay Erwin Oroceo sang Brgy. Baybay, sang mainterview sang Bombo Radyo.

Suno kay Oroceo, sa karon pwede pa mapadulongan ang People’s Park sa luyag mag-unwind apang sa tion nga makumpleto na ang magaserbi barrier, temporaryo nga pagadumilian ang mga pumuluyo nga magpadulong sa lugar agud indi maatrasar ang construction kag mapadasig ang pagpaanyag sa park.

Ginaganyat man sini ang mga food street vendors, nga temporaryo magbalhin sang pwesto agud mangin tayuyon ang pag-ubra sang proyekto.

Sa pihak nga bahin, dismayado naman ang Punong Barangay sa mga nagpadulong sa Baybay sang bag-ong tuig bangud sa mga basura nga ginbilin sa palibot.

Suno diri, may yara man sang ginpahamtang nga basurahan apang madamo sa gihapon ang basura nga nagalapta kag nagalutaw-lutaw sa baybayon.

Nagapangabay man ini sa mga pumuluyo nga mangin responsable sa ginahaboy nga basura bangud ang palibot ang nagabatyag na tuga man sang mga irresponsable nga pumuluyo.

– Bombo Radyo Roxas